SHARE IT :         

మీరు ఇక్కడ ఉన్నారు: హోమ్     న్యూస్

ట్రాన్స్‌లోకి వెళ్లి ఇద్దరు కూతుర్లను చంపేశారు.

Updated: 2021-01-25 10:00:33

ట్రాన్స్‌లోకి వెళ్లి ఇద్దరు కూతుర్లను చంపేశారు.
మితిమీరిన భక్తి మూర్ఖత్వానికి దారి తీసింది. అతీత శక్తుల మీద పెంచుకున్న ఆసక్తి... పేగు బంధాన్ని తుంచేసింది. అల్లారు ముద్దుగా పెంచుకున్న బిడ్డలను... కన్న తల్లే పాశవికంగా తుదముట్టించింది. చిత్తూరు జిల్లా మదనపల్లెలో జరిగిన ఈ దారుణమైన ఘటన... స్థానికంగా తీవ్ర కలకలం రేపింది. అంతుచిక్కని మానసిక సంఘర్షణతో బాధపడుతున్న ఆ తల్లి.. కళ్లముందే పిల్లల్ని చంపుతున్నా... అక్కడే ఉన్న తండ్రి ఘోరాన్ని అడ్డుకోకపోవటం పోలీసులను సైతం విస్తుపోయేలా చేసింది.
కంటికి రెప్పలా కాపాడాల్సినవారే కాటేశారు
చిత్తూరు జిల్లా మదనపల్లె గ్రామీణ మండలం శివనగర్‌లో పురుషోత్తంనాయుడు, పద్మజ దంపతులు కొంతకాలంగా నివాసం ఉంటున్నారు. పురుషోత్తంనాయుడు మదనపల్లెలోని మహిళా డిగ్రీకళాశాల వైస్‌ ప్రిన్సిపల్‌గా విధులు నిర్వహిస్తుండగా... ఆయన భార్య పద్మజ ఓ ప్రైవేట్‌ పాఠశాలకు ప్రిన్సిపల్‌, కరస్పాండెంట్‌గా ఉన్నారు. వీరికి ఇద్దరు కుమార్తెలు. పెద్దమ్మాయి అలేఖ్య వయసు 27 సంవత్సరాలు కాగా... చిన్నమ్మాయి సాయిదివ్య వయసు 22 ఏళ్లు. అలేఖ్య భోపాల్‌లో పీజీ కోర్సును అభ్యసిస్తుంది. సాయిదివ్య బీబీఏ పూర్తి చేసి ఏఆర్‌ రెహమాన్‌ మ్యూజిక్‌ అకాడమీలో సంగీతం నేర్చుకుంటోంది.
వీరంతా గతేడాది ఆగస్టులో శివనగర్‌లో నూతనంగా నిర్మించిన ఇంట్లోకి వచ్చారు. ఇంట్లో తరచూ పూజలు చేసే వారని స్థానికులు చెబుతున్నారు. బయటి వారిని ఇంట్లోకి రానిచ్చే వారు కాదని తెలిపారు. ఆదివారం రాత్రి పూజలు నిర్వహించి.. మొదటిగా చిన్నకుమార్తె సాయిదివ్యను శూలంతో పొడిచి చంపేశారు. తర్వాత పెద్దకుమార్తె అలేఖ్య నోటిలో రాగి చెంబు పెట్టి డంబెల్‌తో కొట్టి హతమార్చారు. ఈ విషయాన్ని పురుషోత్తంనాయుడు... తాను పనిచేసే కళాశాలలోని ఓ అధ్యాపకుడికి చెప్పడంతో ఆయన ఇంటికి చేరుకుని పరిస్థితిని గమనించి పోలీసులకు సమాచారం ఇచ్చారు. మదనపల్లె డీఎస్పీ రవిమనోహరాచారి అక్కడికి చేరుకునే సరికే...అలేఖ్య, సాయిదివ్య ఇద్దరూ అత్యంత పాశవికంగా హత్యకు గురై రక్తపు మడుగులో పడి ఉన్నారు.
ప్రాథమిక విచారణ మేరకు... తల్లిదండ్రులు పద్మజ, పురుషోత్తంనాయుడులు పూర్తిగా మానసిక రుగ్మతలతో బాధపడుతున్నట్లు తెలిసిందని డీఎస్పీ చెప్పారు. ఇంటిచుట్టూ ఉన్న సీసీ కెమెరాలు పరిశీలించిన అనంతరం బయటి వ్యక్తులెవరూ లోనికి రాలేదని తేలిందన్నారు. అతీతశక్తులున్నాయని ఇద్దరు నమ్మేవారని చెప్పారు. సత్యయుగం ప్రారంభమవుతోందని, తన బిడ్డలిద్దరూ తిరిగి ప్రాణాలతో లేచి వస్తారనే చంపినట్లు... తల్లి పద్మజ సమాధానం చెప్పినట్లు డీఎస్పీ తెలిపారు.
క్లూస్‌టీమ్‌ను రంగంలోకి దించిన పోలీసులు ఆధారాలు సేకరించారు. తండ్రి పురుషోత్తం నేరం జరుగుతున్న సమయంలో ఇంటిలోనే ఉండటంతో ఆయన పాత్రపైనా పోలీసులు అనుమానాలు వ్యక్తం చేస్తున్నారు. ఆధారాలన్నీ సేకరించిన అనంతరం మృతదేహాలను మదనపల్లె ప్రభుత్వాస్పత్రికి తరలించారు. ఇంటిలోనే వారి తల్లిదండ్రులు పోలీసుల అదుపులో ఉన్నారు. హత్యలకు కారణాలను మదనపల్లె పోలీసులు అన్వేషిస్తున్నారు.